ဘ၀ထဲက ရတနာ၊ ရင်ထဲက ကဗျာ (၄၀)
၁။
၂၀၀၄ ခုနှစ် ဇွန်လ (၁၀) ရက်နေ့က ပန်းချီ ကိုအောင်တိတ်တယောက် လော့စ်အိန်ဂျလိစ်မြို့ကို ရောက်လာတယ်။ သူ့မိတ်ဆွေ ဟောလီးဝုဒ်က ရုပ်ရှင်မင်းသမီးကလေး မာစီတို့အိမ်မှာ တည်းခိုတယ်။
ကိုအောင်တိတ်နဲ့ ကျွန်တော်က မြန်မာပြည်မှာကတည်းက အလွန်ခင်ခဲ့ကြပါတယ်။ သူက မှုခင်းဆရာဝန်ကြီး ပါမောက္ခ ဦးမောင်မောင်တိတ်ရဲ့သား။ ကျောင်းစာတွေသင်ရမှာ ပျင်းတယ်။ ပန်းချီအနုပညာကိုပဲချစ်တယ်။ ပန်းချီဆွဲတယ်။ ပန်းချီဆရာတွေဖြစ်တဲ့ ကိုဝင်းဖေ၊ ပေါ်ဦးသက်၊ ခင်မောင်ရင်တို့နဲ့နေတယ်။ ရန်ကုန်ပန်းချီကျောင်းကိုတက်တယ်။ ဆရာဦးမြတ်ကျော်၊ ဦးသုခ၊ ဦးလွန်းကြွယ်တို့ရဲ့ တပည့်ပေါ့။
နောက်တော့ သူ့အဖေက သူတို့နဲ့ခင်မင်ရင်းနှီးတဲ့ လူထုတိုက်က ဦးလေးလှ၊ ဒေါ်အမာတို့ဆီကို သူ့သား ကိုအောင်တိတ်ကို အပ်ထားလိုက်တယ်။ ဦးလေးတို့နဲ့ ချင်းတောင်ဘက်ခရီးထွက်ရင်း လိုက်သွားပြီး ချင်းတောင်ပန်းချီကားတွေဆွဲခဲ့တယ်လို့ သိရတယ်။ နောက် အဲဒီတုန်းက မန်းပန်တျာကျောင်းအုပ်ကြီး လုပ်နေတဲ့ ဦးဝင်းဖေ (အုပ်ကြီး) ဆီမှာနေ၊ မန္တလေးကျုံးရေကိုသောက်၊ မန္တလေးဓာတ်ပေါက်သွားတယ် ဆိုပါတော့။
နောက်တော့ ကိုအောင်တိတ်တယောက် အမေရိကရောက်၊ ဆန်ဖရန်စစ္စကိုမှာနေပြီး ပန်းချီဆရာအဖြစ် နေတယ်လို့ကြားလိုက်တယ်။ သူ အင်္ဂလိပ်လိုရေးတဲ့စာအုပ် (၃-၄) အုပ်ကိုလည်း မိတ်ဆွေတွေဆီမှာ တွေ့ဖူးလိုက်ပါရဲ့။
(၂)
လွန်ခဲ့တဲ့ နှစ်နှစ်၊ သုံးနှစ်လောက်က ကျွန်တော် ဆန်ဖရန်စစ္စကို ရောက်သွားတယ်။ မြန်မာစာပေ ဟောပြောပွဲပေါ့။ ဆရာကြီး ကြေးမုံဦးသောင်းနဲ့အတူ။ အဲဒီပွဲမှာ ကိုအောင်တိတ်ကို တွေ့လိုက်ရတော့ဝမ်းသာလိုက်တာ။ သူက အင်္ဂလိပ်လိုရေးတဲ့ ကဗျာဆရာ၊ စာရေးဆရာဖြစ်နေတာကိုး။ ဟောပြောပွဲမှာတော့ သူမပါပါဘူး။ ဒါပေမယ့် ကျွန်တော့်ကို သူ့အိမ်ဖိတ်ပြီး သီးသန့်ထမင်းကျွေးတယ်။ သူက နိုင်ငံရေးတွေ ဘာတွေနဲ့ မပတ်သက်ပါဘူး။ သူက ကဗျာချစ်သူ အနုပညာချစ်သူပါ။
နောက် မြန်မာပြည်ပြန်ပြီး ဒေါ်ဒေါ် ဒေါ်အမာရဲ့ မွေးနေ့ပွဲတက်တယ်။ ပန်းချီပြပွဲတွေလုပ်တယ်။ သူ့အင်္ဂလိပ်ကဗျာ(၄-၅) ပုဒ်ကို မြန်မာမဂ္ဂဇင်းတွေထဲမှာ ဖော်ပြတာကို တွေ့လိုက်ရတယ်။ သူမြန်မာနိုင်ငံပြန်ပြီး မြန်မာပန်းချီဆရာတွေနဲ့ တရင်းတနှီးပြန်ဆုံကြတယ်ဆိုတာကိုပဲ ကျွန်တော်တို့က မုဒိတာပွားပြီး ၀မ်းသာနေမိပါတယ်။
ကျွန်တော်နဲ့တွေ့တော့ မြန်မာသင်ဖြူးဖျာချောတချပ်၊ ရွှေပြည်စိုးဆေးပေါ့လိပ်နဲ့ မြန်မာလုံချည်(၄-၅) ကွင်း လက်ဆောင်ပေးခဲ့တယ်။ မျက်ရည်စို့စရာတွေပေါ့ဗျာ။
နောက် ကျွန်တော့်ကိုလာတွေ့ပြီး သူတည်းခိုတဲ့ ဟောလီးဝုဒ်ရပ်ကွက်၊ ရုပ်ရှင်မင်းသမီးကလေးအိမ် ခေါ်သွားတယ်။ ကျွန်တော်ရယ်၊ သမီးရယ်၊ စာပေ၀ါသနာရှင် ဓမ္မဇောတိဝိပဿနာရိပ်သာ ဆရာတော်ကလေးရယ် အတူလိုက်သွားကြပါတယ်။
(၃)
ဟောလီးဝုဒ်အနီးက Farmers Market ခေါ်တဲ့ လယ်သမားဈေးကို သွားကြတယ်။ အဲဒီက လက်ဖက်ရည်ဆိုင်လေးမှာ စာစကား၊ ပေစကား၊ အနုပညာစကားတွေ စပ်မိစပ်ရာပြောလိုက်ကြတာ ညနေစောင်းရောပါပဲ။ အချိန်ကုန်လို့မှကုန်မှန်းမသိ။ လွတ်လပ်ပါဘိ။
အဲဒီအတွေ့အကြုံကို မှတ်တမ်းတင်တဲ့အနေနဲ့ ဒီလို ကဗျာဖွဲ့မိတယ်။
လွတ်လပ်မှုသည် တို့နတ်ပြည်
လယ်သမားဈေး … တဲ့
တကယ်လား မေးချင်စရာ
ကဖေးတွေအစုံ၊ ဈေးဆိုင်တွေအစုံ
ရုပ်ပုံတွေအဆန်း၊ ထိုင်ခုံတန်းတွေနဲ့
ခမ်းနားပါပေ့၊ ကားတန်းကြီးက တရွေ့ရွေ့။
သစ်ပင်ရိပ်မှာ
မိတ်ဆွေတစု၊ စိတ်ဖြေမှုနဲ့
အနုပညာ ခံစားရာက
မြန်မာ့တို့အရေး၊ နိုင်ငံအရေး
ဆွေးနွေးငြင်းခုန်၊ ယုံကြည်ချက်တွေ
တို့အခြေအနေကို
ဝေဖန်သုံးသပ်၊ အကဲဖြတ်မိကြတယ်။
ညနေစောင်းတော့
လမ်းကြောင်းကိုရှာ၊ အိမ်ပြန်လာတယ်
ဆည်းဆာလမ်းမ၊ မြို့ပြလူထု
ဟောလီးဝုဒ်နဲ့၊ ခရုပတ်လမ်း
ဖြတ်သန်းလာရင်း
ငါ့ရင်တွင်းမှာ၊ ရုန်းရင်းဆန်ခတ်
ကဗျာစပ်မိ
လွတ်လပ်မှုသည်၊ တို့နတ်ပြည် … တဲ့။
ကျွန်တော့်နှုတ်ဖျားကလည်း ထပ်တလဲလဲ ကျူးရင့်မိတယ်။ “လွတ်လပ်မှုသည် တို့နတ်ပြည်” တဲ့။ ဟုတ်တယ်လေ။ အနုပညာသမားမှန်သမျှ သူတို့အချစ်ဆုံးက “လွတ်လပ်မှု” မဟုတ်ပါလား။
လွတ်လပ်စွာတွေးချင်တယ်။ လွတ်လပ်စွာ ခံစားချင်တယ်။ ချစ်ချစ်ခင်ခင်နဲ့ လွတ်လပ်စွာ သဘောကွဲလွဲချင်တယ်။လွတ်လပ်စွာငြင်းခုန်ချင်တယ်။ အမုန်းမပွားစတမ်း။ အာဃာတမထားစတမ်း။ အတေးအငြူအစူတွေနဲ့ အရေးမယူစတမ်း။
အနုပညာသမား၊ စာပေသမားတွေဟာ လူသားကိုချစ်တယ်။ ကိုယ်နေထိုင်ရာကမ္ဘာကိုချစ်တယ်။ ကိုယ်မွေးဖွားရာ နိုင်ငံကိုချစ်တယ်။ တရားမျှတမှုကို ချစ်တယ်။ ငြိမ်းချမ်းရေးကို ချစ်တယ်။ “တရားမျှတ လွတ်လပ်ခြင်းနဲ့မသွေ၊တို့ပြေ- တို့မြေ- များလူ ခပ်သိမ်း ငြိမ်းချမ်းစေဖို့ ခွင့်တူညီမျှ ၀ါဒဖြူစင်တဲ့မြေ တို့ပြေ-တို့မြေ” တဲ့။ တို့နိုင်ငံတော်သီချင်းက ညွှန်တဲ့အသံ။ ဒီအသံကို ငါတို့ချစ်တယ်။ ။
ခေတ်ပြိုင်ဂျာနယ် အတွဲ (၁၃၅)၊ သြဂုတ် ၂၀၀၄
No comments:
Post a Comment